سبحان من يرزق بتـوع الملاييـن

الرازق اللي ما يخيب الرجـا بـه

لي عم عنده معـرضٍ للصواليـن

أموت واعرف بس من وين جابـه

وإذا سألته قـال بعـت الدكاكيـن

ما يدري إني ما هضمت الإجابـه

الشاهد إني رحت له قبـل يوميـن

في قصره العامـر ودقيـت بابـه

قال ارحب ارحب عدّ ورد البساتين

يامرحبـا باللـي لفـا يـا هلابـه

قلت البقا عـدّ النفـل والرياحيـن

يا شيخ شمل اهل الكرم والذرابـه

قال اسلم الله يحفظك لي من العين

وآمر أوامر حضرتـك مستجابـه

قلت الصراحة طالبٍ قرب غاليـن

ودي تزوجنـي كريمتـك يـابـه

ثنّى وقـال اهليـن والله وسهليـن

والكون ترخص لجل عينك رقابـه

لكن ترا عندي شـروط وقوانيـن

قلت اشرط اشرط يا حبيب الغلابه

قال أولاً مهـر العروسـة ثمانيـن

غير الرسوم وغير حق العصابـه

والثانية عمك يبـي منـك سبعيـن

رسم الأبـوّة والنسـب والقرابـه

وام العروسة حقهـا منـك ستيـن

عشانها سـت الحسـن والمهابـه

واخوانها كلن يبي منـك خمسيـن

عداً ونقـداً تنـدرج فـي حسابـه

وخواتها الخمس اعطهن من ثلاثين

عشـان تتوثـق عـروق النسابـه

وتجيب طقم عيار واحد وعشريـن

وخاتم من الماس المصفى ترابـه

واكياس متروسة كعوب وفساتيـن

ألوانهـا واشكالهـا مـا تشـابـه

وموتر بسواقـه وفيـلا بدوريـن

أثاثهـا مـن بطـرتـه ينحكـابـه

واحجز لنا قاعة بقصر السلاطيـن

واحجز بهـا رقاصتيـن وربابـه

وامنع دخول اهل اللحى والبزارين

واعـزم أميـر المنطقـة بالنيابـه

هذي الشروط اللي على بالي الحين

وذكرني اللي ما حسبنـا حسابـه

قلت اذكر الله يا عـدو المساكيـن

واستغفـره لا يبتلـيـك بعـذابـه

الظاهر إنك منت عارف أنا ميـن

أنا لو ارقا فـوق متـن السحابـه

ما جبت حتى نص درزن مواعين

واضحك بكيفك واعتبرهـا دعابـه

شروطكم هذي شـروط المجانيـن

شروطكم شغـل ابتـزاز ونهابـه

شروطكم تقصم ظهـور البعاريـن

شروطكـم همّـن وغـم وكـآبـه

شروطكم والله سيـوف وسكاكيـن

تذبح بنات المجتمـع مـع شبابـه

وين الرضا والعطف واليسر واللين

اللـي ذكرهـا الله بمحكـم كتابـه

وين الصفات اللي أمرنا بها الديـن

وين اختفى نهج النبي والصحابـه

يا عم جعل اللي خلقنا من الطيـن

يرد عقلك مـن خطـاه لصوابـه

ويجعل نصيبي عند غيرك قل آمين

ويحسن عزا الصابر ويجزل ثوابه

قال انت لو فكرت تفكير صاحيـن

ما شفت في مجمل شروطي غرابه

حنا بعصـر العولمـة والمزاييـن

ماهوب عصر الفلسفة والخطابـه

الناس تسعـى للرتـب والنياشيـن

وانت اهتمامك بالشعـر والكتابـه

والشعر ما ينفعك لو هو دواويـن

ما دام جيبك مثل بيـت الخرابـه

يا بوك لا تسمع كلام المصاخيـن

واسأل مجرب عاش في وسط غابه

قلت الله اكبر يا محـرر فلسطيـن

من يسمعك يحسبك ذيـب الذيابـه

تراك شايب راس مالـك رياليـن

والبنت ما تسـوى جنـاح الذبابـه

قال انقلع مالت على وجهك الشين

لا عاد اشوفـك عندنـا يالزلابـه

قلت ابشر ابشر لكن الباب من وين

واقفيت من عنده على صوت بابـه
....


عجبتني هالقصيده وحبيت أنقلها لكم


تحياتي


شيخــة الثبيتيات

يسلمو هل الأيادي التى كتبتها
مقادمي الثبيتي

شيخة الثبيتات ,,,,,,,,,,,,


ذوق أكثر من رائع ,,,,,,,,,,,,,,



والله يعين شاعرها هذا وهو عمه وتاجر كيف الغريب والطفران ,,,,,,,,,,,,,,,,,


سبحان الله في عمه شكله تجر من بنات يبيعهن بيع ,,,,,,,,,,,,,,,,,,


والله يعين الشباب أذا كان كل عم كذا ,,,,,,,,,,,


تقبل مروري ................

اختي شيخه

مشكوووووره نقل اكثر من رااااااائع

قصيده معبره تستحق التمعن فيها



لكي مني ارق واجمل تحيه


تقبلي ودي وردي

انحنت كلماتي خجلا لنقلك الراقي

يسلمووو عالاحساس المرهفـ

استمتعت وانا اناظر كلمات كموج البحر بجمالهـ

يسر الناظــر كل حرف نسقتيهـ


دائمـــاً متالقة وابدا

دربـــكـ التميز وبابكـ الابـــــــداعـ